|
|
Veurschriften omtrent vreterij (13: 1-14:57)
|
Leviticus 13
01De HEER zee tegen Mozes en Aäron:
02"As ain n knobbeltje, oetslag of n lichte plek in t vèl het, dij liekt op vreterij in hoed, den mout e noar priester toubrocht worden, noar Aäron of ain van zien noazoaten.
03Dij mout plek bekieken. As priester zugt dat t hoar op zere stee wit worden is en plek daip in t vèl zit, is t vreterij in hoed en mout priester dij persoon onraain verkloaren.
04As ter n lichte, widde plek in t vèl te zain is dij der nait daip in zit, en t hoar der op nait wit worden is, mout priester dij persoon zeuven doag apaart holden.
05Op zeuvende dag bekikt priester hom vannijs. As t zo is, dat plek nait groder worden is en t vèl nait wieder aantast, mout e hom vannijs zeuven doag apaart holden.
06Zeuven doag loater bekikt priester hom nog ais, en as plek dof worden is en nait groder worden, mout e hom raain verkloaren. t Is den gewoon oetslag. Dij persoon mout zien klaaier wasken en is den weer raain.
07Mor as e noadat priester hom zain het, raain verkloard is en plek loater toch groder wordt, mout e vannijs veur priester verschienen.
08As priester zugt dat plek inderdoad groder worden is, mout e hom onraain verkloaren. Den is t vreterij in hoed.
09Dat zodounde, as ain n kwoal het dij aan vreterij in hoed denken dut, mout e noar priester toubrocht worden.
10 As priester n wit knobbeltje in t vèl zugt mit wit hoar der op, en der n raauw stee ontstoan is,
11 is vreterij in hoed al wied hèn en mout priester hom onraain verkloaren. Hai huift hom nait apaart zetten: man is dudelk onraain.
12-13 As t ter noar oetzugt dat kwoal zok over t haile liggoam oetbraaid het, mout priester dij persoon wieder onderzuiken. As e zugt dat kwoal t haile liggoam inderdoad van kop tou toon aantast het, mout hai hom raain verkloaren. Omdat e haildaal wit worden is, is e raain.
14 Mor zo gaauw as ter raauwe steeën bie hom te zain binnen, is e onraain.
15 As priester n raauw stee zugt, mout e hom onraain verkloaren. Dat raauw stee is onraain, t is n taiken van vreterij in hoed.
16 Mor as raauw stee weer wit wordt, mout e noar priester weeromgoan.
17 As priester zugt dat t vèl wit worden is, mout e hom raain verkloaren: hai is den raain.
18 As ain in t vèl n swèl het dij weer beter wordt,
19 mor der op stee doar swèl zeten het n wit knobbeltje of n roodachteg widde vlek komt, mout dij persoon dat priester zain loaten.
20 As priester zugt dat plek daip in t vèl zit en t hoar der op wit worden is, mout e hom onraain verkloaren. Der is den op stee van swèl vreterij in hoed oetbroken.
21 Mor as priester bie t bekieken van plek zugt dat t hoar nait wit is, plek nait daip in t vèl zit en dof is, mout e hom zeuven doag apaart holden.
22 As plek in dij tied groder worden is, mout priester hom onraain verkloaren. Den is t vreterij in hoed.
23 Mor as lichte plek nait groder worden is en t vèl nait wieder aantast, is t dèl van swèl en mout priester hom raain verkloaren.
24 As ain n brandwond oplopen het en zere plek wordt roodachteg wit of haildaal wit,
25 mout priester der noar kieken. As e zugt dat t hoar op dij plek wit worden is en dat plek daip in t vèl zit, is ter vreterij in hoed ontstoan op stee van brandwond en mout e dij persoon onraain verkloaren. Den is t vreterij in hoed.
26 As priester zugt dat t hoar op lichte plek nait wit is, plek nait daip in t vèl zit en dof is, mout e hom zeuven doag apaart holden.
27 Zeuvende dag bekikt priester hom vannijs. As plek in dij tied groder worden is, mout priester hom onraain verkloaren. Den is t vreterij in hoed.
28 Mor as lichte plek nait groder worden is en t vèl nait wieder aantast het en dof bleven is, is t gewoon n knobbeltje van brandwond en mout priester hom raain verkloaren. Dij plek is den dèl van brandwond.
29 As ain n maal stee onder t hoar of onder board het,
30 mout priester der noar kieken. As e zugt dat kwoal daip in t vèl zit en t hoar op dij stee geel en dun is, mout e dij persoon onraain verkloaren. t Is den oetslag, vreterij in hoed van kop of kin.
31 Mor as priester zugt dat plek nait daip in t vèl zit en der toch gain donker hoar op gruit, mout e hom zeuven doag apaart holden.
32 Zeuvende dag bekikt priester hom vannijs. As ter noar oetzugt dat oetslag in dij tied nait groder worden is, t hoar op dij stee nait geel worden en plek nait daip in t vèl zit,
33 mout dij persoon ale hoar rondom dij stee ofscheren. Priester holdt hom den vannijs zeuven doag apaart.
34 Zeuvende dag bekikt priester plek vannijs en as oetslag nait groder worden is en nait daip in t vèl zit, mout e dij persoon raain verkloaren. Dij mout zien klaaier wasken en is den weer raain.
35 Mor as oetslag in t vèl groder wordt noadat e raain verkloard is,
36 mout priester hom vannijs bekieken. As ter noar oetzugt dat oetslag inderdoad groder worden is, huift e nait noar geel hoar te zuiken. Dij persoon is den onraain.
37 As priester loater zugt dat oetslag nait groder worden is en dat ter donker hoar op dij plek gruit, is kwoal haildaal beter worden. Dij persoon is den raain en priester mout hom raain verkloaren.
38 As n man of vraauw lichte, widde plekken in t vèl het,
39 mout priester der noar kieken. As e zugt dat dij lichte, widde plekken in t vèl dof binnen, den is t gewone oetslag dij t vèl aantast het, en is dij man of vraauw raain.
40 As bie n man t hoar boven op kop oetvaalt, is e gewoon koal en is e raain.
41 En as zien hoar veur op kop oetvaalt, den het e n hoge steern en is e raain.
42 Mor as der n roodachteg widde plek op koale kop komt, vanboven of vanveuren, zol koale plek aantast wezen kinnen deur vreterij in hoed,
43 en mout priester der noar kieken. As e zugt dat dij roodachteg widde plek der oetzugt as vreterij in t vèl doar gain hoar op zit,
44 is man aantast deur vreterij in hoed en is e onraain. Priester mout hom onraain verkloaren. Hai het den vreterij in hoed op kop.
45 Dij deur vreterij in hoed aantast is, mout zien klaaier scheuren, t hoar lös hangen loaten, board en snor bedekt holden en 'Onraain! Onraain!' roupen.
46 Zokkent blift onraain zo laank as kwoal duurt. As ain dij onraain is, mout e apaart wonen en boeten legerkaamp blieven.
47 As ter plekken op wollen of linnen goud kommen,
48 of op scheren- en inslaggoaren van linnen of wol, of op leer of op ain of aander dat van leer moakt is,
49 en dij plekken op goud, leer of goaren of t leren ding binnen gruin of roodachteg, zol zukswat aanvreten wezen kinnen deur vreterij en mout t aan priester zain loaten worden.
50 Priester mout ter noar kieken en dingerais dat aanvreten is zeuven doag apaart holden.
51 Op zeuvende dag bekikt hai t ding vannijs. As e zugt dat plek op goud, goaren of op t leren ding in dij tied groder worden is, is t vreterij. Zukswat is den onraain.
52 In dat gevaal mout e goud, linnen of wollen goaren, of t leren ding dat aanvreten is, opbranden. Omreden t is vreterij, mout zukswat opbraand worden.
53 Mor as priester zugt dat plek op goud, goaren of t leren ding, nait groder worden is,
54 mout e zukswat dat aanvreten is, wasken loaten en vannijs zeuven doag apaart holden.
55 Noa t wasken mout e t vannijs bekieken. As bliekt dat plek dij aanvreten is nait van kleur veraanderd is, den is t onraain, ook al is plek nait groder worden. t Mout opbraand worden, want boudel is totoal bedurven.
56 Mor as priester zugt dat plek noa t wasken dof worden is, mout e plek tou t goud, leer of goaren oetscheuren.
57 As ter den toch weer plekken op t goud, goaren of leren ding kommen, gaait t om n ploag dij aalaan vannijs oetbrekt. Den mout zukswat dat aanvreten is, opbraand worden.
58 As op t goud, goaren of leren ding noa t wasken gain plek meer zit dij aanvreten is, mout t nog ais wosken worden en den is t raain."
59 Dit binnen veurschriften dij bepoalen wanneer wollen of linnen goud, scheren- en inslaggoaren en dingen van leer, dij aanvreten binnen, raain of onraain verkloard worden mouten.
|
Leviticus 14
01De HEER zee tegen Mozes:
02"Dit binnen veurschriften dij gelden wanneer ain dij deur vreterij in hoed trovven is, weer raain verkloard worden kin. Zo ain mout noar priester brocht worden,
03en priester mout boeten legerkaamp bekieken of e van vreterij in hoed beter worden is. As dat t gevaal is,
04mout priester bestellen dat ze veur ain doar t raainegen bie doan worden mout, twij leventege, raaine vogels hoalen en cederholt, karmozijn en hysop.
05Aine vogel let e slachten boven n stainen koem mit wèlwotter.
06Aander leventege vogel mout e, mit cederholt, karmozijn en hysop, in t bloud van vogel dompeln dij boven t wèlwotter slacht worden is.
07Mit dat bloud mout e hom, bie dij noa zien vreterij in hoed t raainegen doan worden mout, zeuven moal besprenkeln. Den mout e hom raain verkloaren. Leventege vogel mout e boeten in t open veld votvlaigen loaten.
08Ain doar t raainegen bie doan is, mout zien klaaier wasken, aal zien hoar ofscheren en zok wasken mit wotter. Den is e weer raain. Hai mag den noar legerkaamp weeromkommen, mor hai mout zeuven doag boeten zien tènt blieven.
09Op zeuvende dag mout e vannijs aal t hoar ofscheren: t hoar op kop, zien board en zien wenkbraauwen. Ale hoar mout e ofscheren en zien klaaier en zien liggoam mout e mit wotter wasken. Den is e weer raain.
10 Op aachtste dag mout e twij jonge rammen mitnemen en n ooi van ain joar, aalmoal zunder lek of brek, mit n koornovver van drij tiende efa waaitenbloum, toumoakt mit eulie, en nog n moatje eulie.
11 Priester dij t raainegen dut, mout hom mit aal dij ovvergoaven noar ingang van soamenkomsttènt tou brengen en hom doar, veur de HEER, hènzetten.
12 Priester pakt den ain van jonge rammen en budt dij, mit de eulie, as schuldovver de HEER aan, noadat e t ovver veur de HEER omhoogstoken het.
13 Ram mout slacht worden op stee in t haailegdom doar daaiern veur t zuvernsovver en t brandovver slacht worden, want net as t zuvernsovver is t schuldovver veur priester; t is alderhaailegst.
14 Priester strikt wat van t ovverdaaier zien bloud aan rechteroorlèl van dij, doar t raainegen bie doan wordt. Hai strikt ook wat bloud op zien rechterdoem en op rechterdikketoon.
15 Den gut priester n luk beetje eulie in linkerhaand,
16 stipt zien rechterwiesvinger in eulie en sprenkelt mit vinger zeuven moal wat eulie noar soamenkomsttènt tou.
17 Van eulie dij e nog in haand het, strikt e wat aan rechteroorlèl van dij persoon, op zien rechterdoem en op rechterdikketoon, over t bloud van schuldovver hèn.
18 Wat ter van eulie den nog in haand overbleven is, strikt e hom op kop. Zo dut priester verzoenen veur hom veur de HEER.
19 Den brengt priester t zuvernsovver en dut e verzoenen veur dij, dij van zien onraainhaid raainegd worden mout. Doarnoa wordt t daaier veur brandovver slacht.
20 Op t lest let priester t koornovver en t brandovver op t altoar in rook opgoan. Zo dut priester verzoenen veur hom en wordt e weer raain.
21 As dij persoon aarm is en dit nait aalmoal betoalen kin, mout e, om veur hom verzoenen te doun, ain jonge ram mitnemen, dij as schuldovver omhoogstoken worden mout, mit n tiende efa waaitenbloum toumoakt mit eulie as koornovver, n moatje eulie
22 en twij törreldoeven of twij jonge gewone doeven - al noar gelang hai t betoalen kin - ain as zuvernsovver en ain as brandovver.
23 Hai brengt t aalmoal op aachtste dag dat e raainegd is noar priester tou, bie ingang van soamenkomsttènt. Doar, veur de HEER,
24 mout priester ram en eulie pakken en dij veur de HEER omhoogsteken.
25 Ram van schuldovver wordt slacht, en priester pakt wat bloud van t ovverdaaier en strikt dat aan rechteroorlèl van dij, doar t raainegen bie doan wordt, op rechterdoem en op rechterdikketoon.
26 Priester gut den wat eulie in linkerhaand,
27 en sprenkelt mit zien rechterwiesvinger wat eulie noar soamenkomsttènt tou.
28 n Luk beetje van eulie in linkerhaand strikt e aan rechteroorlèl van dij persoon, op rechterdoem en op rechterdikketoon, over t bloud van schuldovver hèn.
29 Wat ter nog van eulie in haand overbleven is, strikt e hom op kop. Zo dut priester verzoenen veur dij persoon veur de HEER.
30 Hai dragt as zuvernsovver ain van törreldoeven op of ain van jonge gewone doeven - aal noar gelang dij persoon betoalen kin -
31 en as brandovver aander doef en t koornovver. Zo dut priester verzoenen veur hom veur de HEER."
32 Dit binnen veurschriften dij gelden, wanneer ain dij deur vreterij in hoed trovven is gewone ovvergoaven veur zien raainegen nait betoalen kin.
33 De HEER zee tegen Mozes en Aäron:
34 "As ie ainmoal in Kanaän binnen, t laand dat ik joe in aigendom geven zel, en ik doar n hoes deur vreterij aantasten loat,
35 mout aigender bie priester melden: 't Liekt mie hoast tou dat ik vreterij in t hoes heb.'
36 Priester mout t hoes ontroemen loaten eerdat e kieken komt. Zo veurkomt e dat aal wat in hoes is, onraain verkloard worden mout. Den komt priester om noar t hoes te kieken.
37 As e zugt dat muren invreten binnen en der gruin- of roodachtege koeltjes in zitten,
38 mout e noar boeten tou goan noar ingang van t hoes en der veur zörgen dat t hoes zeuven doag laank dicht blift.
39 Op zeuvende dag komt e weerom. Den mout e bekieken of muren van t hoes wieder aanvreten binnen. As dat zo is,
40 mout e stainen dij aanvreten binnen, votbreken en wegsmieten loaten boeten stad, op n onraain stee.
41 Vanbinnen mouten muren van t hoes ofkraabd worden. t Plaaisterwaark dat ofkraabd is, mout boeten stad op n onraain stee votsmeten worden.
42 Veur oetbroken stainen mouten aandern in stee kommen en t hoes mout vannijs besmeten worden.
43 As stainen oetbroken binnen en muren ofkraabd en vannijs besmeten, en t hoes loater toch weer aanvreten wordt,
44 mout priester vannijs kieken kommen. As e zugt dat plek doar t hoes aanvreten is, groder worden is, is t vreterij. t Hoes is den onraain.
45 t Mout ofbroken worden en stainen, holt en ale plaaisterwaark mouten boeten stad brocht worden, noar n onraain stee.
46 Dij in hoes komt in tied dat dij ofsloten is, is aan oavend tou onraain.
47 Dij in t hoes slept of doar in et, mout zien klaaier wasken.
48 As priester, noadat t hoes vannijs besmeten is, kieken komt en zugt dat plek doar t hoes aanvreten is, nait groder worden is, mout e t hoes raain verkloaren. Ploag is den over.
49 Om t hoes van zunde te zuvern, mout e twij vogels brengen loaten, en cederholt, karmozijn en hysop.
50 Aine vogel mout slacht worden boven n stainen koem mit wèlwotter.
51 Den mout e t cederholt, hysop en karmozijn en aander leventege vogel in t bloud van vogel dij slacht is en in t wèlwotter dompeln en t hoes doar zeuven moal mit besprenkeln.
52 Zo zuvert hai t hoes van zunde mit t bloud van vogel en t wèlwotter en mit leventege vogel en cederholt, hysop en karmozijn.
53 Leventege vogel let e votvlaigen in t open veld boeten stad. Zo dut e verzoenen veur t hoes en wordt t weer raain."
54 Aan zo wied tou veurschriften veur verschillende soorten vreterij: veurschriften veur oetslag op kop of kin,
55 veur vreterij aan goud of hoezen,
56 en veur knobbeltjes, oetslag en plekken in t vèl.
57 Zo kin men persies vaststellen wat of ter doan worden mout as ain onraain is of raain. Aan zo wied tou veurschriften omtrent vreterij.
|
|
